မြန်မာ့သစ်တော သယံဇာတ – Flegt Myanmar

မြန်မာ့သစ်တော သယံဇာတ

သစ်တော ဟူသည်

 

“သစ်ပင်ကြီးငယ် အများအပြား စုရုံးပေါက်ရောက်နေသော တောကို သစ်တောဟုခေါ်သည်” ဟု ၁၉၇၃ ခုနှစ်တွင် ပုံနှိပ်ထုတ်ဝေခဲ့သော မြန်မာ့စွယ်စုံကျမ်း၊ အတွဲ ၁၃၊ စာမျက်နှာ ၂၇၉ တွင် ဖော်ပြထားသည်။

ပညာရေးဝန်ကြီးဌာန၊ မြန်မာစာအဖွဲ့ဦးစီးဌာန က ၂၀၀၈ ခုနှစ်တွင် ရိုက်နှိပ်ထုတ်ဝေခဲ့သော မြန်မာ အဘိဓာန်၊ စာမျက်နှာ ၃၈၄ တွင်လည်း သစ်တော၏ အဓိပ္ပာယ်ကို “သစ်ပင်ကြီးများ ပေါက်ရောက် ရာတော” ဟု ဖော်ပြထားသည်။

ကုလသမဂ္ဂလက်အောက်ခံ၊ စားနပ်ရိက္ခာနှင့် စိုက်ပျိုးရေး အဖွဲ့၏ ၂၀၁၀ ခုနှစ်တွင် ထုတ်ပြန်သော သစ်တော၏ အဓိပ္ပာယ်ဖွင့်ဆိုချက်တွင် “ သစ်တောဆိုသည်မှာ တဆက်တည်းရှိသည့် မြေအကျယ် ၁.၂၃ ဧက (၀.၅ဟက်တာ) နှင့်အထက်ရှိသော မြေပေါ်တွင် အမြင့် ၁၅ပေ (၅မီတာ) အနည်းဆုံးရှိသော အပင်များပေါက်ရာ နေရာဖြစ်ပြီး ထိုအပင်တို့၏ ရွက်အုပ်များသည် ထိုမြေဧရိယာ အကျယ်အဝန်း၏ ၁၀% အနည်းဆုံးဖုံးလွမ်းထားသောနေရာ ဖြစ်သည်ဟု ဖော်ပြထားသည်။


သစ်တောအမျိုးအစား

သစ်တော အမျိုးအစားများတွင် တောကောင်း (Close Forest) နှင့် တောညံ့ ( Open Forest)  ဟူ၍ ထပ်မံခွဲခြားနိုင်ပါသည်။ တောကောင်း ဆိုသည်မှာ သစ်ပင်များ ထူထပ်သိပ်သည်းစွာပေါက်နေပြီး၊ လူတို့၏ ထိပါးနှောင့်ယှက်မှု အလွန်နည်းသောတောဟု ယေဘုယျအားဖြင့် သတ်မှတ်ပါသည်။ စားနပ်ရိက္ခာနှင့် စိုက်ပျိုးရေးအဖွဲ့ FAO ၏ သတ်မှတ်ချက်အရ  ၄၀% နှင့် အထက်သစ်ပင်ကြီးများ ဖုံးလွှမ်းသော တောကို တောကောင်းဟု ဆိုလိုသည်။

သစ်ပင်ကြီးများ မရှိဘဲ လူတို့၏ ထိပါးနှောင့်ယှက်မှု ခံထားရသည့် တောကိုတောညံ့ဟု  ယေဘူယျ အားဖြင့် သတ်မှတ်နိုင်ပါသည်။ စားနပ်ရိက္ခာနှင့် စိုက်ပျိုးရေးအဖွဲ့ FAO ၏ သတ်မှတ်ချက်အရ ၁၀%မှ ၄၀% အတွင်းသာ သစ်ပင်ကြီးများရှိပြီး အခြားမြေအသုံးချမှု မရှိသောတော ဟု သတ်မှတ်ထားသည်။

သစ်တောမြေ

သစ်ပင်အမျိုးအစား၊ အရွယ်အစား စုံလင်စွာပေါက်ရောက်ပြီး  သစ်မဟုတ်သော သစ်တောထွက် ပစ္စည်းများ ဖြစ်သည့်  (ဥပမာ – ပျားရည်၊ ချိတ်၊ ပရဆေး၊ ဝါး၊ မှို၊ မျှစ်စသည်တို့ ) ထွက်ရှိသော မြေကို သစ်တောမြေဟု ခေါ်သည်။ အဆိုပါ သစ်တောမြေတွင် သစ်ပင်မျိုးစုံ ရှင်သန်ပေါက်ရောက်သည့်အတွက်  ရာသီဥတုကို သမမျှတစေပြီး ရေအရင်းအမြစ်ပေါများကာ  တောရိုင်း တိရိစ္ဆာန်များနှင့်မွေးမြူရေးတိရစ္ဆာန်များ အတွက် အစာနှင့်ရေရရှိစေသည့် မြေလည်း ဖြစ်သည်။